لعنة مدونه

واخيراااااااااااااااااااااااااااااااااااااا ياتري هتصدقوا ان طول الفتره اللي فاتت دي كنت بدور علي الباسوورد للمدونه ؟؟ياتري هتصدقوا ان من اخر مره دخلت تبقي دي تاني مره بالصلاة علي النبي اعرف ادخل تاني ؟؟اه وربنا لا كنت فاكره الاميل ولا الباسوورد انا بدات اتشائم من اسم المدونه تقولش لعنه ادخلها كل سنتيين تلاته كده ياناس ؟؟المهم الباسورد بتاع المدونه ضاع والاميل اتسرق وحتي الاميل الاحتياطي باسورده غيرته ونسيته وبالتالي اتسرق اه وربنا من الاخر معجزه اني بكتب في مدونتي تاني ده اعجاز وانجاز تاريخي يحسب لي ويحسب لامي اللي خلفتني كنت هزعل اوي عليها رغم ان محدش يعرف عنها حاجه بس برده انا بحبها بحب اكتب فيها طول الفتره اللي فاتت وهي ضايعه مني وانا بفكر فيها كان ممكن اعمل مدونه تانيه وخلاص بس لا انا عايزه المدونه اللي عملتها في لحظة من لحظات الضياع وبناءا عليه سميتها هذا الاسم الضايع النايم اللي برده اشك بل اكاد اجزم ان اسم المدونه سبب ضياع اميلاتي ونسيان باسورداتي وحاجات تانيه ضاعت وبتضيع وووووووووووووووووووو المهم انها رجعتلي بالسلامه يمكن لاني محتاجه ليها محتاجه لحد افضفض معاه محتاجه ليها جدا اكتر من اي وقت لان الوقتي محدش بيكلم حد ولا فاضي يسمع حد ولا حد طايق حد طب وليه بقي ما اتكلم مع الضايعه اللي بكتب فيها دلوقتي وخلاص وهنا كانت البدايه قررت اني استرد مدونتي مهما كانت الصعوبات والتضحيات هستردها يعني هستردها وربنا هستردها يعني ايه يعني هي مفكره نفسها مين وبنت مين؟؟ وابدت رحلة البحث اميل رايح واميل ضايع وباسوردات ضايعه ومنسيه وسبحان الله وصلت حاجه كده من عند ربنا انا حتي كنت هحكي انا استردتها ازاي بس من كتر اللي عملته مش فاكره اصلا انا عملت ايه مش بقولكوا لعنه اسم المدونه المهم احبيبتي يا مدونتي الف الف حمد الله بالسلامه افكاري وربنا مشتاقه ليكي محتاجه ارغي معاكي ده انا هرغي معاكي رغي السنيين بس ابوس ايدك ارحمي امي الغلبانه(هي العيانه بس مرديتش اكتبها خوفا علي امي حبيبني )وكملي معايا عدل بقي ومتضعيش ولا يضيع باسوردك اللي بيتغير ولا رؤساء مصر في زمانهم خليكي حلوه وعمُري معايا بقي اللهي يعمَر بيتك

وبعد غياب عدنا بجديد ولكن طفيف

ازيك يا مدونتي العزيز اول مره اكتب وانا مبسوطه من زمان ما اتبسطش كده

حاسه ان في انفراجه بدت من بعيد وبدات بشايرها معايا وطبعا ده بعد صبر وتعب ومجهود طول فترة بعدي عنك يا مدونتي العزيزه المهم

فعلا الموضوع ابتدا لما خلاص كنت هموت واتخنق من كتر الفراغ والملل والشلل اللي كنت عايشه فيه بقالي عقد من الزمان وزاوامن كمان

هو مش عقد اوي هو نص عقد او ربعه للامانه بس انا حسيت اني كبرت في السنين دي قرون وقرون المهم بعد النومه الكبيره الرهيبه اللي نمتها دي واللي جت منها طبعا اسمك المجبل يا مدونتي تيمنا بدنيتي النائمه الحالمه

وعلي راي الاغنيه الاولي في تكاتك مصر بصيت لروحي فجاه تعبت من المفاجاه

فعلا بصيت لروحي في المرايا وبامانه اتخضيت وتعبت من اللي شفته شفت اللهم اجعله خير

علي راي اللمبي عيفريت

او عيفريته
المهم هي حاجه مش انا خالص لاقيتني مش عارفه نفسي وفجاه تمردت علي المخلوقه اللي في المرايا وحلفت اني لايمكن الاقي المنظر ده تاني
بس ازاي يا ويندا ازاي يا ويندا ؟؟؟؟

وبعد تمحيص وميص صرخت بعلو صوتي


وجدتها وجدتها

قلت بالعلم نعم انه العلم

فهيا الي العلم والمعرفه ونشيل صدا القرون والعقود اللي فيا دي وعنها وهوب انوب كونوب

قدمت علي الدورات الفزلوكه بتاعة الايام دي اللي طلعيلنا في المقدر جديد علشان يلهونا كشعب مصر عن البلاوي اللي الحكومه بتهببه في شعبها

غيبوا الشباب قبل كده بالحشيش ولما الشعب فاق خلاص قالوا نغيبه بالكوره ولما الشعب فهم وعرف اللي فيها قالوا خلاص نغيبه بدورات تويفيل وكومبيوتر وسلاح التلميذ والاضواء

وفعلا


قررت اني افوق بشوية دورات ايشي تنميه بشريه علي تويفيل علي عمك اي سي دي ال


واصرفي ياماما اصرف يا بيه ده العلم نور

بس استفدت الصراحه وحسيت اني فقت فوقان
وحاليا بمخمخ في دبلومه في كليتي الكريمه كلية علوم دمياط وربنا يستر واعرف افهم حاجه من اللي باخده

لان العلم تقدم اوي عن ايام ما كنت باخده الصراحه والفضل في ذلك لكبير علماء العرب والمصريين عمك احمد زويل ثبت الله خطاه ونفع الامه بعلمه اللي جت فوق دماغي في الدبلومه

اصل انا كيمياء حيوي

المهم اهو قلت احكيلك يا مدونتي الكريمه عن حالي واحوالي وذادي وذوادي
المهم ادعيلي افهم حاجه من البعكوكه اللي باخدها دي لاحسن بعد الشر لو حوصل حاجه هتلاقيني

في المكان اياه

في الركن البعيد الهادي علي سريري

نايمه تاني
اهاااااااااااااااااااااااااا
يالا اسيبك بقي علشان اروح انام خمسه كده سلاموز

لا جديد من شهرين فاتوا

مش ممكن شهرين بحالهم مروا من غير اي جديد فعلا ايه ده ؟؟

الغريب ان كل اللي حواليا من جيران علي اقارب علي اصحاب علي بني البشريه اللي حواليا بيحصل عندهم جديد ومش اي جديد ده الجديد الرهيب العجيب افراح وليالي ملاح وجواز وابصر ايه ومدرك ايه

اللهم لا حسد طبعا

بس لما اجي اقابل حد من اللي اعرفهم ويسالوني اخبارك ايه؟؟؟؟؟؟؟

طبعا السؤال ده سهل جدا وسهل ان اي حد يرد عليه ؟؟


بس الا انا اخري ضحكه صفراء تدل علي الملل

وطبعا تنتهي بكلمة الحمد لله ----- وفعلا الحمد لله

اجي انا بقي اتشمر واسال بس مجرد سؤال ومش هممني الجواب اصلا وربنا بس اهو دايما بغلط واسأل --- اخبارك انتي ايه ؟؟؟

تييييييييييييييييييييييييييييييييييييييييييييييييييت لمدة ساعه ساعتين تلاته

لما هيغمي عليا هي الناس دي بيجبوا الاخبار دي منين وليه اصلا؟؟


هييييييييييييييييه ناس فاضيه ماورهاش نوم ولا دياوله

بس بجد الدنيا بتجري في حتت وواقفه في حتتي بدرجة عجيبه ومريبه وغريبه الواحد لما بيسمع اخبار الناس اللي حواليه بيعرف ان الوقت بيمر فعلا اه وربنا بيطمنوني ان الدنيا بتتغير ؟

بس السؤال بقي ليه بتتغير في حتتهم ومش تتحرك هفوه سنتوفه في حتتي ليه ؟
ليه؟
ليه؟؟

يا دنيا اتحركي بقي شويه علشان خاطري

يا دنيا ارجميني واتغيري شويه

يا دنيا بصيلي يمكن تلاقي فيا ضالتك طب جربي طيب طب بذمتك جربتي ؟؟

ما انتي لو جربتيني كنت هتتحركي علي طوووول ومش هتسيبيني ده انا بنت عسل ؟؟

امممممممممممم
يمكن انا واقفه في شارع غلط ؟؟ولا الاشاره واقفه عندي بس ؟؟
يا دنيا ارحميني ؟؟نيمتيني

نفسي اجاوب بكلام تييييييييييييييييييت وارغي لما حد يسألني علي اخباري او اهرامي انا فعلا بقيت هرم محنط علي ملاية سرير

ولا هتفضل الضحكه الصفراء دي كتير ؟؟

عامة
ههههه



الحمد لله بخير ----اخبارك انتي ايه؟؟

بعتذر علي الغياب اصل نسيت الباسوورد

السلام عليكم ورحمة الله وبركاته

ازيك يا مدونتي معليش بعتذر علي الغياب

مشاغل بقي في النوم انت عارفه لازم الواحد ينام كويس في البرد والتكتكه اللي احنا فيه ده
ده سبب من الاسباب

السبب التاني اني بصراحه نسيت الباسوورد سيادتك
معليش بس قعدت العب في الارقام زي الحرامية كده لغاية اما وصلت للتكه الذكيه المهم الحمد لله انك بخير في اتنين دخلوا علقوا

كويس خير برده

اشكرهم علي ضياع وقتهم معانا
ويارب تكوني عملتي معاهم الواجب كويس

انتي عارفه اني مشغوله في النوم

المهم دلوقتي انا بيحصلي حاجه غريبه جدا في النوم ده
؟؟؟
عارفه احداث اللي بتمر بيها مصر الايام دي حادث نجع حمادي والجندي المصري
لا وفي حدث تاني اغرب السيول
اللي في سينا مش عارفه بقي خير يارب ايه اللي بيحصل ده
وفي كمان حادث ليه علاقه بنومي برده هو زلزال هايتي ده


عارفه بقي العلاقه مابين الاحداث دي ونومي ايه
حصل الاتي تخيلي يا مدونتي الحبيبه اني حلمت بكل حادث من هذه الاحداث؟؟؟؟

اه وربنا في حادث نجع حمادي حلمت اني هناك واقفه مع اخوانا الاقباط انا واخويا بس واقفين في بلكونه لا وشفت الرصاص وكل حاجه
الاغرب بقي اني اتصابت برصاصه منهم
اه وربنا حلمت اني هناك واتضربت رصاصه في قلبي كمان
صحيت مخنوقه جداااااااااااا
مش عارفه معني الحلم ده ومعرفش ده كابوس ولا ايه بس شوفتي لو الرعب اللي حسيته في الحلم ده فعلا حس بيه اخوانا الاقباط
ياااااااااااااااااااااه يبقي حرام بجد انا حسيت برعب رهيب ربنا يصبر اهلهم يارب ويدخل شهدائهم الجنه يمكن ربنا وراني صورة من اللي حصل علشان نحس بيهم شويه

ربنا يصبرهم ويارب ما يكتبها علي مسلم ولا مسيحي
كان حلم مرعب كان نفسي اصحي منه اوي

وصحيت مخنوقه جدا بس الحمد لله اهو ده حاجه

الحاجه التانيه برده حلمت باللي حصل في هايتي تخيلي ده
اه حلمت اني في االسماء فوق وشايفه بلد صغيره بتتهز بطريقه غريبه وبسرعه رهيبه
وكلها وقعت وكل مبانيها وقعت
وانا بقي فوق بشوف اللي حصل
يااه برده كان شعور رهيب كنت سامعه نفسي وانا بقول يا ساتر يا رب يا ساتر يارب

مش عارفه ده يبقي ايه يمكن خطه علشان معدتش انام تاني؟؟؟
يمكن في حد عملي عمل علشان يكرهني في النوم

؟؟؟؟؟
تفتكري مين؟؟؟
انا فعلا بداءت اخاف

بس وهو يعني اللي صحيوا عملوا ايه ؟؟؟
المساعدات لغاية دلوقتي مواصلتش هناك

انا ممكن اوصلها هناك قبليهم
وبالاخير مش هقول غير يظهر ان يوم القيامه قرب

مش يظهر ده اكيد
حد يدعيلي يا جماعه انا عايزة انام وبحلم بمصايب
ادعولي
وادعوا لمصر ربنا يحفظها
علشان محلمش بكوابيس وانام براحتي بقي
ومع السلامه لقد حان موعد النوم كويس اني صليت الفجر
اه ما تخافيش انا علشان الزهايمر اللي انا فيه

حفظت الباسوورد في الموبايل
الا الموبايل فين؟؟؟

عن مدونتي (الدنيا نيمتني)

السلام عليكم ورحمة الله وبركاته


عندما طرأت لي فكرة ان انشأ مدونه خاصه بي احترت كثيرا في تسميتها لانني اريد اسم المدونه ان يكون معبرا وشبيها بي وشبيها بالمقربين لي بل ان يكون شبيها لمن هم في جيلي ايضا اريد اسما يعبر عن حالة سادت شباب مصر من شباب وبنات خصوصا لهؤلاء الذين وفقهم الله وتخرجوا من الكليات او المعاهد اريد اسما يعبر عن هذه المرحلة بالذات مرحلة ما بعد التخرج .

ماذا فعل شباب مصر الذي اعلم انه من خيرة شباب هذه الامه والتاريخ شاهد علي ذلك ولكن ماذا عن شباب الحاضر الذين من المفترض انهم من قادة المستقبل ماذا جني هذا الجيل من بعد تخرجهم ؟ هل وجدا ما كانوا يحلمون بيه منذ الصغر ؟ هل هناك فعلا من حقق حلمه او بمعني اصح حقق اجابته عندما كان يسئل الطفل فينا ----نفسك تكون ايه يا حبيبي لما تكبر ؟


فيتسارع كل طفل بالاجابه المثاليه فهناك من يقول نفسي اطلع دكتور علشان اعالج المرضي

واخر نفسي اطلع مهندس وابني عمارات للفقرا

واخر نفسي اطلع ظابط واقبض علي الحراميه

واخر واخر واخر

يا تري هل نجح كل هؤلاء في تحقيق ما أجابوا عنه ؟؟ ام هناك في الامر شيء

لااعلم لاني عن نفسي وللاسف لم احقق شيئا من اجابتي

وكم تمنيت وسعيت لتحقيقها ولكن هناك ماكان يعارض ذلك ولكني رضيت والحمد لله

امنيتي كانت مثل اجابة الطفل الاول وهي الدكتره اي كان نفسي اطلع دكتوره

وسعيت وذاكرت ودعيت وتمنيت وصليت

ولكن كل هذا لم يتوافق مع ارادة الرحمن والحمد لله علي كل شيء

فقد قرأت يوما للشيخ الجليل محمد متولي الشعراوي انه قال :اذا توافقت ارادة الانسان مع مشيئة الله تم الامر

واذا لم يتوافق ارادة الانسان مع مشيئة الله سبحانه وتعالي لم يتم الامر

فقدر الله وماشاء فعل

ونرجع لاسم المدونه --- فبعد انتكاسات وصعوبات مررت بها لتحقيق امنيتي للاسف وجدتني رافضه لمحاولة اي شيء اخر وقررت ان اعيش هكذا دون احلام وامنيات

حيث انني من المتفوقات دائما ولكنني صدمت في شيء وهو كيف لمتفوقه مثلي لا تدخل كلية الطب فلم اجد اجابه غير اجابة الشيخ الشعراوي وهي التي برددت ناري

المهم دخلت كلية العلوم وسوف احكي عنها في رساله اخري لانها من ضمن الاسباب التي جعلت الدنيا تنيمني

وتخرجت منها من غير اصابات والحمد لله ولكني لم اكن اعلم ان الاصابات سوف تاتي منها بعد التخرج وليس اثناء الدراسه

وتدهور الحال مرة بعد مرة وسنه وراها سنه وانتكاسه ورا انتكاسه لمجرد انني خريجة كلية العلوم

حيث انني اكتشفت ان خريج العلوم يفلح وينجح في اي مكان في العالم وفي اي دوله الا هنا ----- الا في ام الدنيا مصر



وباختصار وجدت بعد هذه الصولات والجولات التي سوف احكي عنها من حين لاخر وجدتني انا ودفعتي بعد سنوات من التخرج

رافعين شعار النوم نعم النوم فليحيا النوم

لدرجة اننا لم نعد نتقابل لاننا جميعا في حالة نوم غيبوبه قاتله العشرين الاوائل علي الدفعه

فين؟

نايمين

نعم مقهورين فوجدنا دوائنا في النوم

ولو صحينا يبقي حجه علشان ننام تاني

لقد قست الدنيا علينا فاخترنا ان نحاربها فزادت قسوتها فخارت قوانا وشربنا اكسير النوم

فتجرعته دفعتنا النابغه واحدا تلو الاخر

فاصبحنا نيام

لوتلاحظوا انني استخدمت جميع الافعال والاسماء التي تتكون من النون والواو والميم

لكي تتدركوا حجم المشكله

ولذلك اخترت للمدونه اسم الدنيا نيمتني



فوداعا مؤقتا فقد حان موعد النوم

وغدا رساله اخري

اخرتها كومبيوتر

بسم الله الرحمن الرحيم

السلام عليكم ورحمة الله وبركاته


يااااااااه اخرتها كده اه يا زمن اخرتها حتة حديده الله اعلم جه منين ولا كان فكرة مين ولا طلع لنا منين المهم بقي هذه الحديده بقدرة قادر هو المتحدث الرسمي لنا في الزمان ده بقي هو نفسنا اللي نتكلم بيه بقي صوتنا اللي مش طالع لحد بقي المترجم للغة الصمت اللي جوه كل واحد فينا بقي اقرب لينا من ابونا او اقرب لينا من اخواتنا بل وصل ان يكون اقرب لينا من امهاتنا واعز اصدقائنا وفيه ناس بقي حتة الحديده دي اقرب ليها من الزوجه وحتي الزوج المهم في الاخر بقي هو كل شيء


مش عارفه اقول يا فرحتي ولا يا وكستي ولا اقول يااااااااااااااااا لهوي اخرتها كومبيوتر -------- طب وبعدين؟ مش عارفيين ادينا ماشيين قصدي ادينا معاه لغاية اما انشوف اخرتها ايه المهم انا رضيت بيه وشكله هو كمان راضي بيا

والسؤال معقوله البني ادمين اللي حوالينا دول كلهم كلهم كلهم -----كلهم محدش عرف يقعدنا امامه بساعات زيه ---- ومحدش عرف يترجم سكوتنا لكلام زيه ----ولا حد عرف ياخدنا من اهلنا واصحابنا زيه ؟؟؟؟؟ يااااااااااااااااااااااااه ده انت قادر

انا دايما في الصيف لما الاقي الدنيا حر اوي اوي وابقي هموت في الحر وكمان تزيد الطينه بله والاقي الدنيا زحمه لا ومفيش مواصلات عارفيين الموقف ده موقف يخنق واقول يارب اوصل بيتنا بقي --------- اااااااااااااااااااه بقي لما اوصل بيتنا يبقي مفيش ادامي غير حاجه واحده وهدف واحد واحد بس ----------- وهو التلاجه الله اجري افتح البوابه واطلع السلم هيه خلاص قربت اوصل وبعدين اضرب الجرس خلاص قربت ------ماما تفتح من غير سلام ولا كلام هو هدف واحد مفيش غيره لازم اوصله لازم ----- وفعلا تطلع في نافوخي خريطه البيت اللي ساحت في الحر وافتكر هيه فين التلاجه فين --------الله هي راحت فين ده وقته تضيع فيه ----وفجاه الاقيها ادامي في الركن البعيد الهادي خلاص قربت لقبلة الحياه ----- وافتح باب التلاجه وبكل رقه وادب الاقيها تنور فلاشات بلمبه محندقه في
الباب وادور علي الارفف علي حاجه احلي واحلي الحاجه اللي اتمنتها طول النهار في الحر وهو----- ازازة الميه المشبره السافعه الله
خلاص هي قربت اللحظه الممتعه افتح ازازة الميه والمسها بايدي بنشوة وسلوي وحنان وقربها ليا واشرب واشرب واشرب وانا مغمضه عنيا بحاول افتكر احساسي في الحر من شويه واغيظ الصورة اللي بتظهر ادامي بحاجه واحده وهو اني اشرب واشرب لغاية اما الصوره اللي في خيالي توقف عند الهدف ايوة الهدف فاكرينه ----- الهدف ازازة الميه اللي في التلاجه


صدقوني ساعتها لما اخلص شرب ميبقاش عندي غير امنيه واحده بس عارفين ايه هي --------- ابوس ام اللي اخترع التلاجه واشكره

اقوله شكرا شكرا شكرا تشكرات كثيره جدا