وبعد غياب عدنا بجديد ولكن طفيف

ازيك يا مدونتي العزيز اول مره اكتب وانا مبسوطه من زمان ما اتبسطش كده

حاسه ان في انفراجه بدت من بعيد وبدات بشايرها معايا وطبعا ده بعد صبر وتعب ومجهود طول فترة بعدي عنك يا مدونتي العزيزه المهم

فعلا الموضوع ابتدا لما خلاص كنت هموت واتخنق من كتر الفراغ والملل والشلل اللي كنت عايشه فيه بقالي عقد من الزمان وزاوامن كمان

هو مش عقد اوي هو نص عقد او ربعه للامانه بس انا حسيت اني كبرت في السنين دي قرون وقرون المهم بعد النومه الكبيره الرهيبه اللي نمتها دي واللي جت منها طبعا اسمك المجبل يا مدونتي تيمنا بدنيتي النائمه الحالمه

وعلي راي الاغنيه الاولي في تكاتك مصر بصيت لروحي فجاه تعبت من المفاجاه

فعلا بصيت لروحي في المرايا وبامانه اتخضيت وتعبت من اللي شفته شفت اللهم اجعله خير

علي راي اللمبي عيفريت

او عيفريته
المهم هي حاجه مش انا خالص لاقيتني مش عارفه نفسي وفجاه تمردت علي المخلوقه اللي في المرايا وحلفت اني لايمكن الاقي المنظر ده تاني
بس ازاي يا ويندا ازاي يا ويندا ؟؟؟؟

وبعد تمحيص وميص صرخت بعلو صوتي


وجدتها وجدتها

قلت بالعلم نعم انه العلم

فهيا الي العلم والمعرفه ونشيل صدا القرون والعقود اللي فيا دي وعنها وهوب انوب كونوب

قدمت علي الدورات الفزلوكه بتاعة الايام دي اللي طلعيلنا في المقدر جديد علشان يلهونا كشعب مصر عن البلاوي اللي الحكومه بتهببه في شعبها

غيبوا الشباب قبل كده بالحشيش ولما الشعب فاق خلاص قالوا نغيبه بالكوره ولما الشعب فهم وعرف اللي فيها قالوا خلاص نغيبه بدورات تويفيل وكومبيوتر وسلاح التلميذ والاضواء

وفعلا


قررت اني افوق بشوية دورات ايشي تنميه بشريه علي تويفيل علي عمك اي سي دي ال


واصرفي ياماما اصرف يا بيه ده العلم نور

بس استفدت الصراحه وحسيت اني فقت فوقان
وحاليا بمخمخ في دبلومه في كليتي الكريمه كلية علوم دمياط وربنا يستر واعرف افهم حاجه من اللي باخده

لان العلم تقدم اوي عن ايام ما كنت باخده الصراحه والفضل في ذلك لكبير علماء العرب والمصريين عمك احمد زويل ثبت الله خطاه ونفع الامه بعلمه اللي جت فوق دماغي في الدبلومه

اصل انا كيمياء حيوي

المهم اهو قلت احكيلك يا مدونتي الكريمه عن حالي واحوالي وذادي وذوادي
المهم ادعيلي افهم حاجه من البعكوكه اللي باخدها دي لاحسن بعد الشر لو حوصل حاجه هتلاقيني

في المكان اياه

في الركن البعيد الهادي علي سريري

نايمه تاني
اهاااااااااااااااااااااااااا
يالا اسيبك بقي علشان اروح انام خمسه كده سلاموز

لا جديد من شهرين فاتوا

مش ممكن شهرين بحالهم مروا من غير اي جديد فعلا ايه ده ؟؟

الغريب ان كل اللي حواليا من جيران علي اقارب علي اصحاب علي بني البشريه اللي حواليا بيحصل عندهم جديد ومش اي جديد ده الجديد الرهيب العجيب افراح وليالي ملاح وجواز وابصر ايه ومدرك ايه

اللهم لا حسد طبعا

بس لما اجي اقابل حد من اللي اعرفهم ويسالوني اخبارك ايه؟؟؟؟؟؟؟

طبعا السؤال ده سهل جدا وسهل ان اي حد يرد عليه ؟؟


بس الا انا اخري ضحكه صفراء تدل علي الملل

وطبعا تنتهي بكلمة الحمد لله ----- وفعلا الحمد لله

اجي انا بقي اتشمر واسال بس مجرد سؤال ومش هممني الجواب اصلا وربنا بس اهو دايما بغلط واسأل --- اخبارك انتي ايه ؟؟؟

تييييييييييييييييييييييييييييييييييييييييييييييييييت لمدة ساعه ساعتين تلاته

لما هيغمي عليا هي الناس دي بيجبوا الاخبار دي منين وليه اصلا؟؟


هييييييييييييييييه ناس فاضيه ماورهاش نوم ولا دياوله

بس بجد الدنيا بتجري في حتت وواقفه في حتتي بدرجة عجيبه ومريبه وغريبه الواحد لما بيسمع اخبار الناس اللي حواليه بيعرف ان الوقت بيمر فعلا اه وربنا بيطمنوني ان الدنيا بتتغير ؟

بس السؤال بقي ليه بتتغير في حتتهم ومش تتحرك هفوه سنتوفه في حتتي ليه ؟
ليه؟
ليه؟؟

يا دنيا اتحركي بقي شويه علشان خاطري

يا دنيا ارجميني واتغيري شويه

يا دنيا بصيلي يمكن تلاقي فيا ضالتك طب جربي طيب طب بذمتك جربتي ؟؟

ما انتي لو جربتيني كنت هتتحركي علي طوووول ومش هتسيبيني ده انا بنت عسل ؟؟

امممممممممممم
يمكن انا واقفه في شارع غلط ؟؟ولا الاشاره واقفه عندي بس ؟؟
يا دنيا ارحميني ؟؟نيمتيني

نفسي اجاوب بكلام تييييييييييييييييييت وارغي لما حد يسألني علي اخباري او اهرامي انا فعلا بقيت هرم محنط علي ملاية سرير

ولا هتفضل الضحكه الصفراء دي كتير ؟؟

عامة
ههههه



الحمد لله بخير ----اخبارك انتي ايه؟؟

بعتذر علي الغياب اصل نسيت الباسوورد

السلام عليكم ورحمة الله وبركاته

ازيك يا مدونتي معليش بعتذر علي الغياب

مشاغل بقي في النوم انت عارفه لازم الواحد ينام كويس في البرد والتكتكه اللي احنا فيه ده
ده سبب من الاسباب

السبب التاني اني بصراحه نسيت الباسوورد سيادتك
معليش بس قعدت العب في الارقام زي الحرامية كده لغاية اما وصلت للتكه الذكيه المهم الحمد لله انك بخير في اتنين دخلوا علقوا

كويس خير برده

اشكرهم علي ضياع وقتهم معانا
ويارب تكوني عملتي معاهم الواجب كويس

انتي عارفه اني مشغوله في النوم

المهم دلوقتي انا بيحصلي حاجه غريبه جدا في النوم ده
؟؟؟
عارفه احداث اللي بتمر بيها مصر الايام دي حادث نجع حمادي والجندي المصري
لا وفي حدث تاني اغرب السيول
اللي في سينا مش عارفه بقي خير يارب ايه اللي بيحصل ده
وفي كمان حادث ليه علاقه بنومي برده هو زلزال هايتي ده


عارفه بقي العلاقه مابين الاحداث دي ونومي ايه
حصل الاتي تخيلي يا مدونتي الحبيبه اني حلمت بكل حادث من هذه الاحداث؟؟؟؟

اه وربنا في حادث نجع حمادي حلمت اني هناك واقفه مع اخوانا الاقباط انا واخويا بس واقفين في بلكونه لا وشفت الرصاص وكل حاجه
الاغرب بقي اني اتصابت برصاصه منهم
اه وربنا حلمت اني هناك واتضربت رصاصه في قلبي كمان
صحيت مخنوقه جداااااااااااا
مش عارفه معني الحلم ده ومعرفش ده كابوس ولا ايه بس شوفتي لو الرعب اللي حسيته في الحلم ده فعلا حس بيه اخوانا الاقباط
ياااااااااااااااااااااه يبقي حرام بجد انا حسيت برعب رهيب ربنا يصبر اهلهم يارب ويدخل شهدائهم الجنه يمكن ربنا وراني صورة من اللي حصل علشان نحس بيهم شويه

ربنا يصبرهم ويارب ما يكتبها علي مسلم ولا مسيحي
كان حلم مرعب كان نفسي اصحي منه اوي

وصحيت مخنوقه جدا بس الحمد لله اهو ده حاجه

الحاجه التانيه برده حلمت باللي حصل في هايتي تخيلي ده
اه حلمت اني في االسماء فوق وشايفه بلد صغيره بتتهز بطريقه غريبه وبسرعه رهيبه
وكلها وقعت وكل مبانيها وقعت
وانا بقي فوق بشوف اللي حصل
يااه برده كان شعور رهيب كنت سامعه نفسي وانا بقول يا ساتر يا رب يا ساتر يارب

مش عارفه ده يبقي ايه يمكن خطه علشان معدتش انام تاني؟؟؟
يمكن في حد عملي عمل علشان يكرهني في النوم

؟؟؟؟؟
تفتكري مين؟؟؟
انا فعلا بداءت اخاف

بس وهو يعني اللي صحيوا عملوا ايه ؟؟؟
المساعدات لغاية دلوقتي مواصلتش هناك

انا ممكن اوصلها هناك قبليهم
وبالاخير مش هقول غير يظهر ان يوم القيامه قرب

مش يظهر ده اكيد
حد يدعيلي يا جماعه انا عايزة انام وبحلم بمصايب
ادعولي
وادعوا لمصر ربنا يحفظها
علشان محلمش بكوابيس وانام براحتي بقي
ومع السلامه لقد حان موعد النوم كويس اني صليت الفجر
اه ما تخافيش انا علشان الزهايمر اللي انا فيه

حفظت الباسوورد في الموبايل
الا الموبايل فين؟؟؟